တစ်ခါတစ်လေအိပ်ယာထဲမှာငြိမ်ငြိမ်လေးနေပြီး၊ဘာမှန်းမသိတဲ့အတွေးတွေနဲ့ နေဖူးပါသလား။ ကျွန်မကတော့ အမြဲလိုလိုနေခဲ့ဖူးတယ်။ အဲဒီလိုအချိန်တွေမှာဟိုးအဝေးကြီးမှာရှိနေတဲ့ အမေ့ကိုလည်း လွမ်းတယ်။ အမေနဲ့အတူရှိဖူးခဲ့တဲ့ရက်တွေကိုလည်း လွမ်းတယ်။
အမေ့လက်ရာ ထမင်းဟင်းတွေကိုလည်းလွမ်းတယ်။ အမေကဟင်းမချက်တတ်ဘူးလို့ ၊လူတွေက ပြောကြတယ်။ နင့်အမေကကန်စွန်းရွက်နဲ့ချဉ်ပေါင်ရွက်တောင် ခွဲခြားတတ်တာမဟုတ်ဘူးလို့တောင် ပြောဖူးကြတယ်။ ဒါပေမဲ့ ကျွန်မအတွက်ကတော့ ဒီန့အချိန်အထိ အမေချက်တဲ့ဟင်းတွေသာ စားဖူးသမျှ အစားအစာတွေထဲမှာ အကောင်းဆုံးလို့၊ ထင်နေမိတာ အမှန်ပဲ။ ၁၇နှစ်လောက်ဝေးကွာနေရပေမဲ့၊ ထမင်းစားတိုင်း အမေ့ရဲ့လက်ရာ ဟင်းလေးတွေကို စိတ်နဲ့အမြဲတမ်းအရသာခံကြည့်နေမိတုန်းပဲ။ ဟင်းချေးထူတဲ့ကျွန်မအတွက် ဘယ်တော့မှမရိုးနိုင်တဲ့ဟင်းလေးတွေကတော့ မေမေချက်တဲ့ ဟင်းလေးတွေပါပဲ။ ပြီးတော့ ပြောကြသေးတယ်။ မေမေက သံယောဇဉ်နည်းတယ်တဲ့။ အဲဒါကြောင့် ..နင်တို့နဲ့ဝေးဝေးမှာ သူမို့နေနိုင်တာပေါ့ ..တဲ့လေ။မဟုတ်နိုင်ပါဘူး ..။ ကျွန်မ သိတယ်။ မေမေက ကျွန်မတို့နဲ့ခွဲချင်မှာမဟုတ်ပါဘူး။ တကယ်လို့ ခွဲချင်လို့ခွဲခဲ့တယ်ဆိုရင်တောင် ကျွန်မက မေမေ့ကို ခွင့်လွှတ်ခဲ့ပါတယ်။ ဘာဖြစ်လို့လဲဆိုတော့ ..ကျွန်မအတွက်တော့မေမေနဲ့အစားထိုးရမဲ့ မိခင်ရင်ခွင်ဆိုတာ မရှိလို့ပါပဲ။ ကျွန်မငယ်ငယ်တည်းက မေမေနဲ့တူတူ မအိပ်ရရင်ငိုခဲ့ဖူးတယ်။ ဒီနေ့အထိတိုင် အဲဒီ့မျက်ရည်တွေဟာ မခြောက်သေးသလိုပါပဲ ..။ ကျွန်မရင်ထဲမှာ မေမေကအမြဲရှိနေပါတယ်။ မေမေ မသိနိုင်တဲ့ ကျွန်မရင်ထဲက ..မေမေနဲ့ပတ်သက်တဲ့ အမှတ်တရတွေဟာ ဘယ်တော့မှ ပျောက်သွားမှာမှ မဟုတ်တာပဲလေ ..။
မေမေ့အတွက် ကျွန်မဟာ သမီးဆိုးတစ်ယောက်ဖြစ်နေခဲ့မယ် ဆိုရင်လည်း.....မေမေကျေနပ်ဖို့ အမြဲတမ်းတောင်းပန်နေမှာပါပဲ။ မေမေငြိုငြင်မှာစိုးတဲ့စိတ်နဲ့ မေမေ့အပေါ်မှာပြောချင်တဲ့ကျွန်မရဲ့ သတိတရနေ့တွေ ညတွေကိုတောင် ...... ကျွန်မ ဖွင့်မပြောရင်း အခုတော့ ကျွန်မ တိတ်တိတ်လေး နေတတ်ပါပြီ ..။
တစ်ခုတော့ရှိပါတယ် ..ကျွန်မလိုပဲ ..အမေနဲ့ဝေးနေရတဲ့ ကလေးလေးတွေကို မြင်ရင်တော့ အိပ်ယာထဲမှာ
အခုလိုပဲ ငြိမ်ငြိမ်လေးတွေးနေရင်းနဲ့ ..သူတို့ကိုယ်စား ...မျက်ရည်တွေကျမိနေတုန်း .............။
ကျွန်မရဲ့ အိပ်မက်တွေတိုင်းဟာ ..ကိန်းဂဏန်းတွေလို အမြဲတမ်းပုစ္ဆာတွေ ပေးလေ့ရှိတယ်။ ဒါကြောင့် ..ကျွန်မက အိပ်မက်တွေကို နာမည်ပေးထားတယ် ...........................အိပ်မက်သင်္ချာ ...လို့။
အခုရေးထားမိတဲ့ ကျွန်မမေမေရဲ့အကြောင်းလေးကတော့ ကျွန်မရဲ့ သင်္ချာပုစ္ဆာ နံပါတ် ၁ ပဲဆိုပါတော့ ...။
နောက်ထပ် အိပ်မက်သင်္ချာတွေလည်း ရေးဖြစ်နေဦးမယ် ...ထင်ပါရဲ့ ............။ ။
No comments:
Post a Comment